На работната средба, претседателката на Врховниот суд, Беса Адеми, го запозна амбасадорот на Европската Унија, Михалис Рокас со надлежностите, активностите и заложбите на Врховниот суд кои се однесуваат на владеењето на правото, судските реформи и примената на европските стандарди.

Амбасадорот Рокас ја истакна значајната улога на Врховниот суд на Република Северна Македонија, нагласувајќи дека за Република Северна Македонија владеењето на правото е фундаментален услов за европскиот пат и обезбедувањето на европската иднина на државата и граѓаните.

Претседателката на Врховниот суд ја потенцираше континуираната поддршка и соработка со Европската Унија и дека е неопходно препораките, советите и укажувањата на Унијата во делот на правосудството да се имплементираат со засилена динамика.

Исто така, на средбата се говореше и за активностите на Врховниот суд кои се позитивно нотирани во извештаите на Европската унија, а се однесуваат на унапредувањето на судската практика, конзистентноста на судските одлуки и применувањето на принципите на отвореното судство.

Во таа насока, на работната средба беше нагласено дека Врховниот суд на Република Северна Македонија и Делегацијата на Европската Унија во Република Северна Македонија ќе продолжат со взаемната соработка која и во иднина интензивно ќе се продлабочува во интерес на владеењето на правото, правдата и граѓаните.