Во Извештајот од извршениот надзор се констатира дека Врховниот суд на Република Северна Македонија презел бројни активности за унапредување на отвореноста, ги донел и ги применува потребните внатрешни процедури за работата на судот согласно законите и Судскиот деловник и ги има објавено сите акти од значење за работата на судот со што се дава придонес за транспарентноста во работењето.

Исто така, во Извештајот се нотираат иницијативите и воведувањето на нови функционалности за унапредување на АКМИС системот и дигитализацијата, измените на Деловникот за работа кои се однесуваат на отвореноста на Општите седници и реализацијата на целите и заложбите на Советот за отворено судство. Судските одлуки и актите редовно се објавуваат на веб страницата на судот, постои база на судски одлуки и не постои рачна распределба на предмети.

Врховниот суд презема активности за унапредување на судската практика и иницирањето на нови модули во врска со конзистентноста на судските одлуки. Воедно, се истакнуваат извештаите од посетите сите пониски судови во државата и се оценува дека ваквите посети потребно е да продолжат и во иднина.

Извештајот се осврнува и на правилното работење во делот на архивирање на предметите и на опсежните активности во врска со архивскиот материјал согласно правилата за архивско работење.

Во извештајот на Министерството за правда се истакнува дека потребно е под итно да се изберат нови судии во Врховниот суд на Република Северна Македонија, со оглед дека судот подолго време е оставен без потребниот број на судии.