Претседателката Адеми во своето обраќање истакна дека за препораките на Оценската мисија од круцијално значење е самата динамика и континуитет на нивното спроведување.

„Овие препораки непосредно се поврзани и со принципите на владеењето на правото. Транспарентниот пристап кон овие прашања, засновани на јавна и стручна дискусија ќе дадат голем придонес за нивното спроведување. Препораките се основата за потребните реформи на Судскиот совет и тие треба да се гледаат и низ призмата на европскиот пат на државата. Во тоа е нивната суштина и цел. Од тие причини од круцијално значење е самата динамика и континуитет на нивното спроведување.

Но, треба секогаш да се има предвид дека промените носат предизвици за кои е потребно доследно почитување на принципите за независно судство, искрени намери засновани на етичност и совесност и многу посветеност и храброст. Потребен е поттик за промена на правната култура бидејќи принципите треба да се жива практика, а не декларативни зборови.

Врховниот суд на Република Северна Македонија има јасна визија и заложби за независноста на судството. Транспарентноста, интегритетот, стручноста, заштитата на човековите права, заштитата на јавниот интерес и јавната доверба се основните постулати во работата на Врховниот суд.

Само со почитувањето и со применувањето на овие постулати и принципи и доследното почитување на уставното начело на поделба на власта може да се обезбеди вистинска независност на судството.

За сите овие прашања укажав и при посетите на пониските судови. Мило ми е што ваквите посети се инспирација и охрабрување, како за судовите, така и за другите правосудни институции“, посочи претседателката на Врховниот суд во своето обраќање.