Претседателката на Врховниот суд на Република Северна Македонија, Беса Адеми, истакна дека истражувањата на Коалицијата коиндицираат со Извештаите на Врховниот суд на Република Северна Македонија за ивршените посети на пониските судови и кои имаат иста цел, а тоа е да се нагласи важноста на начелото на финансиска независност како предуслов за независноста на судството.

„Со посетите на судовите се овозможи непосреден увид на состојбите во судовите и информирање за проблемите со кои се соочуваат судовите и кои предизвикуваат реперкусии во нивното функционирање. Воедно, посетите имаа за цел да се унапреди соработката помеѓу судовите во Република Северна Македонија, заснована на законските и меѓународни принципи за независност на судството од законски, функционален и финансиски аспект“, истакна Адеми.

На настанот беше потенцирано дека општа констатација од извршените посети на апелационите и основните судови од страна на Врховниот суд на Република Северна Македонија е дека судовите во Република Северна Македонија се соочуваат со бројни проблеми кои предизвикуваат сериозни реперкусии во работењето и дека потребно е преземање на итни мерки за надминување на нотираната состојба која е алармантна.